梵谷曾經講過「認識自己並非易事，描繪自己又何嘗容易」 佢所講嘅描繪自己唔係單單繪畫自己嘅形態 而係畫進靈魂深處，用繪畫去顯示真正嘅自己 但要用自畫像去認識自己係需要好真實咁面對鏡入面嘅自己 逼視自己內心，分析自己 其實對於常人黎講係一件好困難嘅事 或者只有瘋狂，先可以用如此誠實嘅心去逼視自己 而梵谷正正就係咁瘋狂 而呢種瘋狂其實主要黎自佢家族遺傳嘅情緒病所影響 狂鬱症 呢個病令佢心情好容易大上大落 特別去到晚期，經常處於狂躁激情嘅亢奮同沮喪絕望嘅低沉憂鬱嘅兩極之間 咁交叉極端嘅情緒不斷咁折磨佢 而自畫像就成為佢對精神疾病嘅真實剖白 每一幅都係咁不安、咁痛苦、咁瘋狂 所以佢係比常人更加想了解自己，想去明白內心深處狂熱嘅野獸到底係咩黎 咁我地要點樣面對咁瘋狂嘅自畫像呢 先從頭睇一次佢所有嘅自畫像，從佢嘅用色、筆法留意 你會發現梵谷嘅所有經歷都會係佢嘅自畫像入面顯示哂出黎 由佢去巴黎發展，到接觸印象派、新印象派、浮世繪等 成個過程你都可以從佢嘅自畫像入面搵到脈絡足跡 維基可以睇哂佢所有自畫像 建議輕輕咁睇一次先 https://zh.wikipedia.org/wiki/%E6%A2%B5%E9%AB%98%E8%87%AA%E7%94%BB%E5%83%8F%E5%88%97%E8%A1%A8 Self-Portrait with Dark Felt Hat at the Easel, 1886 先從第一幅油畫自畫像開始睇起 你會睇得出佢仲係食薯者嘅影子之下，筆觸沉穩、用色深沉暗鬱 呢幅自畫像有個特別之處係佢畫到自己個樣唔太清楚 同其他自畫像相比，無左一對明顯直視靈魂嘅雙眼 另外一點係佢咁多張自畫像當中，只有三張嘅形態係畫緊畫 呢張係第一張，可能當時佢準備去巴黎或者初到巴黎，想話比自己聽係以一個畫家嘅身份去生活 Self-Portrait with Pipe, 1886 Self-Portrait with Pipe, 1886 之後呢幾張都係比較暗沉，但你會發現佢嘅穿着唔同左 佢換哂西裝，仲要擔住支煙斗，成個上流社會人士咁 呢啲咁有紳士氣息嘅畫作，反映出梵谷係初到巴黎嘅時候對自身社會地位嘅追求同渴望 佢望融入巴黎嘅社會，並且得到朋輩嘅認同 我諗係因為認識到好多新朋友，特別係塞尚呢啲有錢仔 但過左無耐就打回原形，現實嘅打擊又令佢重新正視潦倒嘅自己 Self-Portrait, Winter 1886/87 之後呢張可以見到佢開始有顯露少許嘅筆觸，面部同衣服都有 再到後個幾張就更加明顯，特別係衣服同背景 好明顯係受到印象派嘅影響 而呢個位開始，佢嘅自畫像已經離唔開呢一種筆法 Self-Portrait with Grey Felt Hat, Winter 1886/87 呢一張係我覺得佢呢期自畫像之中嘅佳作 開始有一個統一嘅繪畫風格，整個面部主要都係用線條表達 而且呢啲線條嘅動勢都係指向雙眼，令人無可避免咁受到梵谷強硬而有目的性嘅眼神逼視住 另外背景嘅筆觸所帶出嘅動勢都非常之強勁 加上佢咁紳士嘅裝束 令成幅畫有種英姿颯爽嘅感覺 不過當你仔細咁品味呢一幅自畫像，你又會感受到畫入面嘅梵谷有少許屈屈不忿嘅意味 到底係咩事呢 好引人入勝 Self-Portrait, Spring 1887 最後就係呢幅 呢幅自畫像就更加顯示到梵谷當時受到新印象派嘅影響 成幅畫都係用點描同短促嘅線條組成 衣服係用紅綠對比，背景用藍橙對比 好明顯運用左秀拉嘅色彩光學去表達 而且你要留意佢嘅背景開始有漩渦狀 可以話係呢個時候開始慢慢發展出梵谷獨有嘅漩渦畫法 成幅畫會感受到梵谷好似煩惱緊啲嘢，流露出不安同困惑啲表情 咁佢煩緊啲咩呢 可能關系到下一幅自畫像 不過今次講梵谷嘅自畫像就到此為止啦 其他就留返時間線相合先再講 睇左咁多張自畫像 你可以見到梵谷成世人所創作嘅自畫像係非常豐富，完全媲美得上林布蘭 係成個西方藝術史上面，可以創作到咁豐富可觀嘅自畫像 我諗都係非林布蘭同梵谷呢兩位荷蘭畫家莫屬 佢地各自嘅自畫像對後世都影響非常深遠，能夠咁精彩咁記錄自己嘅一生，成為後世畫自畫像嘅典範 而且你會感受到梵谷同林布蘭嘅相同之處 佢地同樣都係透過自畫像不斷咁去審視自我，記錄當下情感嘅一刻 借自畫像去睇清自己最深處嘅靈魂 梵谷可以話係繼承左林布蘭凝視內在嘅風格 不過佢地不同之處在於林布蘭嘅感情係淡淡咁慢慢滲透出黎，不斷累積 而梵谷所畫嘅自畫像係剛烈，強硬而直接 你一睇就感受到佢嘅不安，痛苦，孤獨，無助 特別係佢渴求得到他人理解同接受嘅心 但點解去到呢一幅就要停呢 因為梵谷帶左頂新帽 下一幅自畫像嘅梵谷就由Felt Hat(氈帽)變成Straw Hat(草帽) 轉頂新帽關事係邊呢 呢頂新帽係關於梵谷離開巴黎，去新天地發展嘅 佢捨棄左紳士風範嘅氈帽，轉型為農夫嘅草帽 你可能會問點解佢要離開過得咁快樂嘅巴黎 我只可以答你因為佢係一隻無人困得住嘅野獸